Татарстанда фән һәм бизнес берләшә: проектларны идеядән тормышка ашыруга кадәр алып бару системасы булдырыла

Казанда фәнни-практик семинар узды. Анда Татарстан Фәннәр академиясе вәкилләре, югары уку йортлары, тикшеренү командалары һәм үсеш институтлары катнашты. Чарада республикада фәнни һәм технологик проектларны бердәм система аша үстерү мәсьәләсе күтәрелде.

Семинарны Татарстан Фәннәр академиясе оештырды. Чарада академия президенты Рифкать Миңнеханов чыгыш ясады һәм төбәктә фән белән бизнесны берләштерү юнәлешендә алып барылган эшләр турында сөйләде.

Очрашу барышында билгеле булганча, республикада проектларны  үстерү системасы формалаша. Ул идея барлыкка килүдән башлап, гипотезаны тикшерү, прототип ясау, базарга чыгу һәм масштаблаштыру этапларын үз эченә ала. Һәр баскыч өчен аерым ярдәм чаралары каралган: грантлар, конкурслар, акселераторлар, стартап-студияләр һәм инвестиция фондлары эшли.

«Бүген фәнни эшләнмәләр практик кулланылыштан аерым яшәргә тиеш түгел. Без система төзибез: университетлар, студент командалары һәм тикшеренүчеләр үсеш институтлары белән бергә эшли», – дип билгеләп үтте Рифкать Миңнеханов.

Система кысаларында студентлар инициативаларына да игътибар бирелә. Алар федераль программаларда катнаша, шул исәптән «Умник», «Старт» һәм «Студенческий стартап» проектлары аша үз идеяләрен үстерә.

Семинар нәтиҗәләре буенча, республикада фәнни проектларны комплекслы алып бару системасын камилләштерү дәвам итәчәк. Тулырак мәгълүматны Татарстан Фәннәр академиясенең рәсми ресурсларында табарга мөмкин.

Чыганак: Татар-информ