Тукталышлар артты: Казан – Кукмара поезды Бөреле станциясендә дә туктый башлады

Казан – Кукмара юнәлешендәге №6436 шәһәр яны поезды хәрәкәтенә үзгәрешләр кертелде. «Содружество» компаниясе хәбәр итүенчә, 27 апрельдән башлап состав Бөреле станциясендә өстәмә тукталыш ясый башлады. Бу карар пассажирлар өчен уңайлыкларны арттыру максатыннан кабул ителгән.

Оештыручылар мәгълүматына караганда, поезд Биектау станциясенә кадәр элеккеге расписание буенча йөри. Бөреле станциясенә ул 15:50 сәгатьтә килеп җитә һәм 15:51 сәгатьтә кузгала. Аннары Коркачык станциясендә 16:01–16:02 сәгатьләрдә туктый, һәм алга таба хәрәкәтен гадәти график буенча дәвам итә.

Компаниянең рәсми хәбәрендә болай диелә:
«Пассажирларга хезмәт күрсәтү сыйфатын яхшырту максатыннан, поезд Бөреле станциясендә утырту һәм төшерү өчен тукталачак».

Әлеге яңалык җирле халык өчен аеруча әһәмиятле. Бөреле һәм якын-тирә авылларда яшәүчеләргә хәзер Казанга яки Кукмарага бару тагын да уңайлырак булачак.

Чыганак: Татар-информ