Ана күңелен айкап чыгарган очрашу

Күпербашта хәйрия концерты үткән. Моңа кадәр өйдән бик чыкмаган Фәридә апаны ул көнне аягы үзеннән үзе мәдәният йортына тарткан.

Фәридә Нигъмәтҗанова өчен бигрәк тә алып баручысы күңелен айкап чыгардай очрашуга тиң була.

Күптән концертларны шулай бирелеп караган, тагын да ныграк бирелеп сөйләгән кешене күргән юк иде. Махсус шул хакта әйтер өчен редакциягә менгән бит Фәридә апа.

– Мине дөрес кеше түгел бу, дип уйларсыз инде. Әмма мин дөреслекне сөйлим. Иске Чүриле авылында яшәп, Чулпан клубында эшләүче Шәүкәт Вәлишин алып барды аны. Күңелемә ошады. Чыгыш ясаучылар турында мактап сөйли, шул арада чыгып җырлый, шигырьләр сөйли. Кайлардан барысын да өйрәнеп, хәтерендә калдырып өлгергән, аптырарсың, – диде ул.

Фәридә Нигъмәтҗанова үзе Күпербаш авылыннан. Гомер буе фермада эшләгән, ферма мөдире булган. Хәзерге вакытта лаеклы ялда. Улы Ленар беренче көннәреннән үк мобилизаияләнеп махсус хәрби операция барган зонага киткән. Ленарның улы Нияз да армиядән соң контракт төзеп, шунда хезмәт итә.

– Икенче тапкыр яраланды инде. Әле тернәкләнү үтү өчен өенә җибәрделәр. Бер кайтуында өйләнеп киткән иде. Баласы туды. Чаллыда яшиләр, – диде ул.

Бала кайгысы ана өчен олы хәсрәт. Исән-сау булсалар да, көн дә үлем белән күзгә күз очрашып йөриләр бит. Бәлки, шуңа да моңарчы түзгән ана йөрәге телгәләнә, парә-парә киләдер.

– Кеше өчен иң кирәк нәрсәләр – тигезлек, тынычлык, сәламәтлек, – ди ул. – Башта иремне югалттым, аның артыннан улымны, соңрак оныгымны махсус хәрби операция зонасына озаттым. Боларның барысы да бер йөрәккә бит. Ана йөрәгендә.

Шуңа да, концертта махсус хәрби операциядә хезмәт итүчеләр турында сүз чыккач, Фәридә апа күз яшьләрен тыеп кала алмый, сөйләүчесе ана күңеленә май булып ята.

Шәүкәт Вәлишинны ул беренче тапкыр “Җәвит кәмит” тапшыруында күрә. Аннан “Пирамида” күңел ачу үзәгендә. “Аның кебек гармунда уйнаган, җырлаган кешене очратканым юк иде, аптырадым”, – ди. Бу юлы сәхнәдә күрү олы кеше өчен зур шатлыкка әверелгән. Концерттан соң янына чакырып алып: “Ярый, чыкканмын. Сине генә карап утырдым”, – дигән. 

– Авыл үзешчәннәре куйды ул концертны. Программага үзгәреш кертергә дип алып барырга Шәүкәт Вәлишинны чакырдылар. Әнинең аны чынбарлыкта сәхнәдә күрүенә күңеле булды, – диде кызы Лилия.

– Әйе. Шушы араларда Шәүкәт Вәлишинга алтмыш яшь тула, дип ишеттем дә, мөмкинлектән файдаланып, үзем, өлкәннәр, гомумән, авыл халкы исеменнән рәхмәт әйтәсем килде, – диде Фәридә апа. – Тигезлек, тынычлык, сәламәтлек, иҗат уңышлары телим аңа. Безне сөендергән өчен Ходаем үзен сөендерсен.