"Район Кулибиннары" җиңүчеләре сукачылар бәйрәмендә бүләкләнәчәк

Традицион уздырылып килүче сукачылар бәйрәме быел 7 июнь көнне уздырылачак. Катнашучылар иртәнге 9да Ташкичү авылына җыела.

Әлеге бәйрәмдә безнең сайтта узган "Район Кулибиннары" бәйгесе җиңүчеләре дә чакырыла. Исегезгә төшерәбез, иң күп тавыш җыюче егет - Яңа Кенәрдән Илфат Сабиров (4050 тавыш)

Икенче урында - Каенсардан Инсаф Борһанов (3303 тавыш)

Өченче урында - Хәсәншәехтән Рәсим Абдуллин (1678 тавыш)

Җиңүчеләрне район башкарма комитеты җитәкчесе Ренат Гатиятов бүләкли. Элеккеге район авыл хуҗалыгы һәм азык-төлек идарәсе җитәкчесе буларак ул бәйгенең иганәче булып тора. Редакция исеменнән аңа зур рәхмәтебезне җиткерәбез. Бүләкләр әлегә сер булып калсын. Аларның югары дәрәҗәдә әзерләнгәнлеген генә әйтәбез әлегә