Дәүләттән гаилә кешбэгы: 2026 елдан НДФЛның 7 процентын кемнәр кайтара алачак?

2026 елдан Россиядә балалы гаиләләргә ярдәм итүнең тагын бер чарасы – еллык гаилә түләве гамәлгә керә. Ул «Гаилә» илкүләм проектына керә һәм эшләүче әти-әниләргә салым йөкләмәсен киметергә ярдәм итәргә тиеш. Башка күп кенә пособиеләрдән аермалы буларак, бу түләү керемгә айлык өстәмә булып тормый – бу инде түләнгән салымның бер өлешен кире кайтару. Бу хакта “Татар-информ” яза.

Календарь ел дәвамында эш бирүче әти-әнинең хезмәт хакыннан стандарт ставка буенча НДФЛны 13% (яки 15%, әгәр керем билгеләнгән лимиттан артып китсә) тотып кала. Әти-әни гариза биргәннән соң, салым хезмәте салымны ташламалы ставка буенча 6% ка күчерә, ә фактта тотылган һәм саналган сумма арасындагы аерманы мөрәҗәгать итүчегә бер тапкыр күчерү юлы белән кире кайтара. Асылда дәүләт инде түләнгән салымны кире кайтара, ә аванс бирми, шуңа күрә акчаны ел тулысынча тәмамланганнан соң гына алырга мөмкин.

Шунысы мөһим: кабат исәпләүне бер ел өчен генә башкаралар. Мисал өчен, 2026 елда 2025 ел өчен гариза бирергә мөмкин, 2027 елда – 2026 ел өчен һәм башкалар.

Түләүне гаиләләрендә кимендә ике бала тәрбияләнүче эшләүче әти-әниләр (шул исәптән уллыкка алучылар, опекуннар һәм попечительләр) алырга хокуклы.