Кичә югалган ир-атның мәете табылган

Бүген иртән Мөслим районының Үрәзмәт авылында коткаручылар буадан 53 яшьлек ир-атның мәетен чыгарган.

Бу хакта «Татар-информ» агентлыгына Россия Гадәттән тыш хәлләр министрлыгының ТР буенча Баш идарәсе матбугат хезмәтеннән хәбәр иттеләр.

Авылда яшәүчеләр 112 бердәм номерына шалтыратып белдергәнчә, ир-ат кичә юкка чыккан. Ул су кергән вакытта югалган дип фаразлана — яр буенда аның киемнәрен табып алганнар.

Коткаручылар мәетне полиция хезмәткәрләренә тапшырган. Әлеге хәлнең нечкәлекләре ачыклана.

Россия Гадәттән тыш хәлләр министрлыгының ТР буенча Баш идарәсе искәрткәнчә, республикада коену сезоны әле ачылмады. Шуңа бәйле рәвештә, теләсә нинди сулыкта, хәтта су керү өчен җиһазландырылган пляжларда да коенырга ярамый.

«Татар-информ» агентлыгы элегрәк хәбәр иткәнчә, Кече үлчәмле суднолар буенча дәүләт инспекциясе казанлыларга җәй башына кадәр су керү тыелуы хакында искәрткән иде. 
 https://tatar-inform.tatar/news/incident/16-05-2021/tatarstanda-kotkaruchylar-buada-kich-yugalgan-ir-atny-m-eten-tapkan-5823408