Мөслим районында М7 – Иске Айман – Октябрь юлы ябылу вакыты озайтылды

Мөслим районындагы М7 «Волга» – Иске Айман – Октябрь автомобиль юлында реконструкция эшләре дәвам итә. Шуңа бәйле рәвештә әлеге участокта транспорт хәрәкәтен вакытлыча чикләү вакыты озайтылган.

Татарстан Республикасы Транспорт һәм юл хуҗалыгы министрлыгы мәгълүматларына караганда, юл 25 марттан бирле ябылган. Башта аны 26 июньдә ачарга планлаштырсалар да, төзелеш эшләренең дәвам итүе сәбәпле чикләүләр 31 июльгә кадәр гамәлдә калачак.

«Чикләү автомобиль юлын реконструкцияләү буенча эшләр башкарылу белән бәйле», – дип хәбәр итәләр ведомствода.

Хәзерге вакытта йөртүчеләргә альтернатив маршрутлардан файдаланырга киңәш ителә. Әйләнеп узу өчен Актаныш – Мөслим, Мөслим – Иске Сәет, Иске Сәет – Сикия, М7 «Волга» – Үлиман юллары, шулай ук М7 федераль трассасы тәкъдим ителә.

Юл төзелеше һәм яңарту эшләре төбәктә транспорт инфраструктурасын камилләштерүгә юнәлдерелгән. Юл хезмәтләре йөртүчеләрдән вакытлы уңайсызлыкларга аңлап карауларын һәм сәфәр маршрутларын алдан планлаштыруларын сорый. 

Чыганак: Татар-информ