Синоптиклар көндез +15...+23 градуска кадәр җылылык фаразлый.
«Метео» фараз үзәге җитәкчесе Александр Шувалов “Татар-информ”га белдергәнчә, киләсе атнада республикага җылы һава көньяк-көнбатыш һәм көньяк юнәлешләрдән керүен дәвам итәчәк. Бу чорда көчле циклоннар көтелми.
Шуңа күрә Татарстанда явым-төшемсез көннәр белән беррәттән, кыска вакытлы яңгырлар да булырга мөмкин. Әмма аларның көчле һәм озакка сузылуы көтелми. Синоптик якын көннәрдә һава температурасы нигездә +15...+19 градус тирәсендә булачагын билгеләп үтә.
Гидрометеорология үзәге мәгълүматларына караганда, 18 сентябрьдә республикада аязучан болытлы һава торышы урнаша, явым-төшемнәр сизелерлек булмый. Төнлә +2...+7 градус, көндез аерым районнарда +17...+22 градус җылылык көтелә.
19 сентябрьдә дә һава торышы шундый ук характерда булачак. Төнлә термометрлар +3...+8 градус күрсәтсә, көндез һава +18...+23 градуска кадәр җылыначак.
Синоптиклар сентябрьнең икенче яртысында температураның климатик нормадан 1–1,5 градуска югарырак булырга мөмкинлеген фаразлый. Ә октябрьдә җылы көннәрнең тагын бер дулкыны — «әбиләр чуагы» кабатлану ихтималы да юк түгел.
Нет комментариев