Проект «Нәтиҗәле конкурентлыкка сәләтле икътисад» илкүләм проекты кысаларында оештырылды, дип хәбәр итә Татарстан Икътисад министрлыгының матбугат хезмәте.
Финалга Татарстанның төрле почмакларыннан 12 команда чыкты. Алар арасында Казан, Минзәлә, Буа, Кама Тамагы, Теләче, Тәтеш, Бөгелмә һәм Сарман районнары вәкилләре бар иде.
Яшь эшмәкәрләр традицион һөнәрләрдән алып заманча технологияләргә нигезләнгән проектларга кадәр тәкъдим итте. Алар арасында экологик чиста продукция җитештерү, балалар өчен мини-роботлар ясау, GPS-трекерлы аксессуарлар әзерләү кебек инновацион идеяләр булды. Шулай ук милли традицияләрне саклауга юнәлдерелгән проектлар да тәкъдим ителде: татар печеньесы җитештерү һәм милли бизәкләр кулланылган киемнәр тегү.
Татарстан икътисад министрының беренче урынбасары, Эшмәкәрлекне үстерү департаменты директоры Наталья Кондратова сүзләренчә, проект балаларга финанс грамотасы һәм эшмәкәрлек нигезләрен үзләштерергә, командада эшләргә һәм үз идеяләрен якларга ярдәм итә. Моннан тыш, укучылар реаль бизнес тәҗрибәсе туплый, бу аларга киләчәктә һөнәр сайлауда һәм үз эшләрен башлап җибәрүдә файдалы булачак.
Бәйге нәтиҗәләре буенча Минзәлә, Буа һәм Сарман районнары командалары төрле номинацияләрдә җиңү яулады. Аларга «Сколково» инновация үзәгенә һәм Мәскәүнең башка алдынгы мәйданчыкларына сәфәр мөмкинлеге биреләчәк. Шулай ук Җәлил бистәсенең 2 нче урта мәктәбенә һәм Казанның 146 нчы лицеена эшмәкәрлекне үстерү өчен сертификатлар тапшырылды.
«Мәктәп бизнес-старты» проекты Татарстан Рәисе йөкләмәсе буенча өченче ел рәттән үткәрелә. 2022–2025 елларда анда 45 меңнән артык мәктәп укучысы катнашкан. Шуларның 21 меңнән артыгы кече шәһәрләр һәм авыллардан булган.
Нет комментариев