Чия пирогы

Равилә Маликова әнисенең чия пирогы рецептын тәкъдим итә – пешереп карыйсызмы? 

Эшләү тәртибе

Эчлек түбәндәгечә әзерләнә:
1 кг чияне, согы белән бергә, кайнау халәтенә җиткерергә. 200 г шикәр комын, 2 чеметем корицаны, 2 чеметем мөшкәт (мускат) чикләвеген, 40 г крахмалны һәммәсен бергә кушарга һәм, бертуктамый бутый-бутый, аз-азлап чия өстенә салырга. Әзер эчлеккә 20 г сыер мае кушарга.

Камыр ясау тәртибе:
Камыр өчен:

• 650–700 г он, 
• 1 кап көпшәкләндергеч (разрыхлитель), 
• 250 г май кирәк. 

Майны эре угыч аша чыгарганнан соң, барысын бергә кушып, кул белән уабыз. 
200 г шикәр комын һәм 2 йомырканы аерым савытта күпертеп алганнан соң, аңа 200 г каймак кушабыз. Бутыйбыз. Аннан бу массаны он өстенә салабыз һәм камыр басабыз. 
Әзер камырны ике өлешкә бүләбез: зурракка һәм кечерәккә. Икесен дә, пакетка тыгып, 1 сәгатькә суыткычка куябыз. 

Пирог түбәндәгечә ясала:
30 см зурлыгындагы форма кирәк булачак. 
Аны сыер мае белән майлыйбыз.
Камырның зуррак өлешен җәеп, формага куябыз. 
Тәмам суынган эчлекне салабыз. 
Камырның икенче өлешен җәеп, өстенә каплыйбыз. Чит-читләрен үзегез теләгәнчә ясагыз. 

Якынча 50 г шикәр комы, 50 г он, 20 г сыер мае алып һәм шулардан валчык ясап, аны пирог өстенә сибегез.

Пешкәндә пар чыксын өчен, пирогның уртасына кечкенә генә уемтык ясарга онытмагыз. 
 

Чыганак: Сөембикә