Арчада реестр хатасын төзәтү юлларын эзлиләр

Бүген узган районның эшмәкәрләр һәм фермерлар Советы утырышында шул мәсьәлә каралды. Бактың исә, моннан берничә ел элек ызанлауны эшләгән оешма ясап биргән документ хәзерге таләпләргә җавап бирми икән. Имеш ,ул вакыттагы җир ызанлау технологиясе белән аны төгәл итеп ясап булмаган. Законны да бозмаганнар үзе, әмма җир участогы гына төгәл итеп картага төшерелмәгән. Хәзер инде ул җирдә берәр нәрсә салырга яки сатарга уйласаң - яңадан ясат та, яңадан түлә икән. Моны ничек аңларга? Прокуратурага, судка мөрәҗәгать итүдән дә мәгънә юк. Теге беткән оешма да дөрес эшләгән бит.

Бу хәлдән ничек чыгарга?  Росреестр вәкиле И. Нургалиев мондый очракларда иң беренче чиратта аларга мөрәҗәгать итәргә киңәш итте. Әмма мәсьәлә ачык калды.

Район прокуроры Фәнис Шәйхаттаров та эшмәкәрләргә ярдәм итәргә әзер булуын әйтте. "Гомумән, соңгы вакытта эшмәкәрләр эшенә  төрле тикшерү оешмаларының кысылуын прокуратура даими күзәтеп бара.Законсыз тикшерүләргә чик куела",-диде ул.

Утырышта катнашкан район башлыгы Илшат Нуриев та эшмәкәрләрне мондый катлаулы хәлләрдән чыгу юлларын бергәләп эзләргә чакырды. Ул кече һәм урта бизнесны үстерү өчен район хәкимиятенең хезмәттәшлеккә әзер булуын белдерде.