Саву җиһазларының чисталыгы ни өчен мөһим?

Фермада саву җиһазларының тышкы яктан чиста булуы әле санитар таләпләрнең тулысынча үтәлүен аңлатмый. Күзгә күренмәгән сөт калдыклары торбаларда, шлангларның вак ярыкларында, клапаннарда һәм башка төеннәрдә калырга мөмкин.

Мондый урыннарда микроорганизмнар үрчү өчен уңай шартлар барлыкка килә. Шуңа күрә сөт җитештерүдә җиһазларны дөрес юу һәм дезинфекцияләү аерым әһәмияткә ия.

Лаборатор анализлар нәрсәне күрсәтә?

ГБУ «Арча РГВО» хезмәткәрләре хуҗалыкларга планлы рәвештә чыгып, санитар мониторинг үткәрә. Тикшерүләр вакытында саву аппаратларыннан, сөт үткәргечләрдән һәм танк-суыткычлардан анализ алына.

Лаборатор анализ нәтиҗәләре җиһазларның санитар торышын бәяләргә, юу чараларының нәтиҗәлелеген һәм санитар эшкәртүнең сыйфатын тикшерергә мөмкинлек бирә. Шулай ук җиһазларны юу вакытында тиешле температура режимының саклануы да мөһим фактор булып тора.

Белгечләр ачыклаган кимчелекләр буенча хуҗалыкларга тәкъдимнәр бирә. Алар юу һәм дезинфекцияләү режимнарын төзәтүгә, җиһазларны эшкәртү тәртибен камилләштерүгә юнәлдерелә.

«Саву җиһазларының санитар торышын лаборатор контрольдә тоту сөт җитештерүнең һәр этабында куркынычсызлык таләпләрен үтәргә ярдәм итә», — дип билгелиләр ветеринария белгечләре.

Сөт сыйфаты уртак җаваплылыктан тора

Сыйфатлы сөт җитештерүдә ферма хезмәткәрләренең көндәлек эше зур роль уйный. Саву җиһазларын вакытында һәм дөрес юу, дезинфекцияләү, санитар таләпләрне үтәү — сөтнең сыйфатына турыдан-туры йогынты ясый торган шартлар.

Арча районында сөт җитештерүче хуҗалыкларда мондый мониторинг санитар таләпләрнең үтәлешен контрольдә тотарга һәм җитештерү процессындагы кимчелекләрне вакытында ачыкларга мөмкинлек бирә.

Хәзер Арча һәм Арча районы яңалыкларын безнең Telegram-каналдан да белә аласыз