«Алгарыш» яшьләр үзәгендә «Өмет чаткысы» тернәкләндерү үзәге балалары өчен иҗади остаханә үткәрелде

"Алгарыш" яшьләр үзәгендә «Өмет чаткысы» тернәкләндерү үзәгендә тәрбияләнүчеләр өчен роза чәчәге ясау буенча иҗади остаханә оештырылды. Ачык һавада узган чарада балалар үз куллары белән матур чәчәкләр ясап, иҗат шатлыгын уртаклашты.

Остаханәне яшьләр үзәгенең актив волонтеры үткәрде. Ул катнашучыларга роза чәчәген ясауның һәр этабын аңлатып, эш алымнарын күрсәтте һәм һәр балага ярдәм итеп торды.

Чара саф һавада, табигать кочагында узды. Балалар зур кызыксыну белән иҗат итте, һәркайсы үзенең кабатланмас эшен башкарырга тырышты. Роза чәчәкләренең һәр таҗы сабырлык, тырышлык һәм күңел җылысын чагылдырды.

Мондый иҗади очрашулар балаларның вак моторикасын, күзәтүчәнлеген һәм иҗади сәләтләрен үстерүгә ярдәм итә, аралашу мөмкинлекләрен киңәйтә һәм күңел күтәренкелеге бүләк итә.