Арча районында вакцина ясатучыларга материаль кызыксындыру чарасы куллана башладылар

Бу турыда район башкарма комитеты җитәкчесе Расул Мөхәррәмов белдерде. Аның сүзләренә караганда, вакцина ясатучының дәүләт хезмәтләре порталындагы шәхси кабинетында бу турыда хәбәр барлыкка килүгә райондагы төрле сәүдә һәм хезмәт күрсәтү оешмаларында ул кешегә ташламалар бирелә. Әлегә бу акциядә «Филадельфия»кафесы, «Село», «Арское АТП» ширкәтләре, «Арск МЕД», " Автолайф", «Роза» бакча үзәге,  «Западный»,  «Арзани» кибетләре, «Кофе ОК», «Ильком» һәм башкалар катнаша. Арча районында вакцина ясатучыларга ташлама бирүче оешмалар исемлеге белән http://Arsk.Tatarstan.ru сайтында танышырга мөмкин. Расул Ринатович әйтүенчә, мондый оешмаларның саны тагын да артачак.