Арча яңалыклары
Арчада Нәүрүз бәйрәме узды
Арча стадионында бәйрәм кунакларын җыр-бию, кайнар чәй, бәйрәм коймагы көтә иде.
Бүген Арча стадионында Нәүрүз бәйрәмен билгеләп үттеләр. Элек-электән килгән кышны озату, язны каршы алу бәйрәме җыр, бию, театраль күренешләр белән үрелеп барды.
Стадиондагы йортларда исә балалар өчен күңелле уеннар оештырылды, мастер-класслар эшләп торды. Арча Үзәк китапханәсе хезмәткәрләре укучыларны төрле уеннар белән сөендерсә, икенче йортта “Казан-арты” тарих-этнография музее хезмәткәрләре балалар белән бергә чәчәкләр ясады.
Балалар өчен бәйрәм төрле күңелле уеннарга гына түгел, ә баллы тәм-томнарга һәм бүләкләргә дә бай булды. Алар рәхәтләнеп биеде, җырлады, уйнап күңел ачты.
Шунда ук кайнар чәй, бәйрәм коймагы белән дә сыйландылар.
Бәйрәм хуҗасы Нәүрүзбикә, дөньяларыбыз, илләребезгә тынычлык теләп, яз бәйрәме беән котлады һәм матур җыр бүләк итте.
Нәүрүз фарсыча “яңа көн” дигәнне аңлата. Ул бик борынгыдан килгән бәйрәм – Яңа елны каршылау бәйрәме булган. Нәүрүз көн белән төн тигезләшкән чорга – 21-22 мартка туры килгән. Шулай ук бу бәйрәм безнең төбәкләрдә, язны каршылап, язгы чәчү эшләре алдыннан үткәрелә торган халык бәйрәме булып санала.
ХIХ гасырдан калган мәгълүматларга караганда, Нәүрүз атна-ун көнгә сузылган. Ул көннәрне йорттан-йортка кереп “нәүрүз әйтеп” йөрү гадәте булган. Нәүрүз такмагын әйтеп, хуҗаларга бәхет, уңышлар теләп йөргәннәр.
Следите за самым важным и интересным в Telegram-каналеТатмедиа
Хәзер Арча һәм Арча районы яңалыкларын безнең Telegram-каналдан да белә аласыз
Нет комментариев