Кукмарада янгында ир-ат һәлак булган

Кукмарада ташландык йортта чыккан янгында ир-ат һәлак булган. Бу хакта Кукмара районының 117нче янгын сүндерү-коткару часте хәбәр итә.

Кичә 23.29 сәгатьтә Глонасс-112 системасы буенча 117нче янгын сүндерү-коткару частеның элемтә пунктына Кукмара шәһәренең Толстой урамында кеше яшәми торган йорт януы турында хәбәр алына.

Янгын сүндерүчеләр килгәнче, ут веранда, түбә һәм йортның эчке өлешен тулысынча колачлый. Аларны күршеләр каршы алып, йортта беркем дә яшәмәве, электр һәм газ белән тәэмин итү туктатылуы турында хәбәр итә. Йорт эчендә билгеле бер яшәү урыны булмаган кеше калырга мөмкинлеге турында җиткерәләр.

Реклама

Янгын сүндергән вакытта ир-атның бик нык янып беткән гәүдәсе табыла. Хәзерге вакытта мәрхүмнең кем булуы ачыклана.

Янгын нәтиҗәсендә 90 квадрат метр мәйданда йорт һәм веранда кара күмергә әйләнә.

Янгынның сәбәпләре ачыклана.

Фото: 117нче янгын сүндерү-коткару часте

http://kukmor-rt.ru/news/sogy-yanalyklar/kukmarada-yangynda-ir-at-lak-bulgan