Вакыт бара... Ягулык чорына да күп калмады

Татарстан Республикасының төзелеш, архитектура һәм торак-коммуналь хуҗалыгы министрлыгында видеоконференция булды. Аны министр урынбасары Илдус Насыйров алып барды. Чираттагы республиканың әзерлек штабы утырышында ягулык-энергетик объектларының һәм торак-коммуналь комплексларның 2022-2023 елдагы ягулык чорына әзерлеге турында сөйләшенде. Видеоконференциядә безнең районнан башкарма комитет җитәкчесе Ренат Гатиятов һәм белгечләр катнашты. Республика күләмендәге утырыш тәмамлангач, Ренат Гатиятов җитәкчеләр, белгечләр белән районның ягулык чорына әзерлеге турында сөйләшү алып барды. Арчадагы күп фатирлы йортларны ныклап төзекләндерү турында да сүз булды. 2022 елга планга кертелгән йортларда инде төзекләндерү эшләре, вак-төяктән кала,  тәмамланган. Ә менә ягулык чорына обьектларны әзерләү буенча эшлиселәр бар әле. “Вакыт бара, ягулык чорына әзерләнүгә бөтен көчне тупларга!” – дип тәмамлады сөйләшүне Ренат Гатиятов