Йоклап калырга туры килде

Утар Атыда театр елы уңаеннан үткәрелгән чарага Нурия Абдуллина да килгән иде. Тамашачы буларак. Ул күптәннән лаеклы ялда инде. Нурия апа озак еллар шушы мәдәният йортын җитәкләде. Ул вакытта да спектакльләр әзерләп, район буенча бәйгеләрдә катнашалар иде. Миңа жюри әгъзасы да булырга туры килде. Әле дә хәтердә, Утар Атыда спектакль булган көнне бик каты буран башланды. Ул чакта хәзерге кебек транспорт йөреп тормый. Мәдәният йортында йоклап калырга туры килде. Телефоннар да юк. Мәктәп белән идарәдән тыш. Алар ябык. Бер яктан өйдә әни, икенче яктан мин ут йотып тордык. Икенче көнне исән-сау кайтып кергәч кенә әнинең эченә җан керде. 

Нурия апа да хәтерлидер әле ул вакыйганы. Аның директор булып эшләгән вакыты иде.

Менә шушы Нурия апага бүген 80 яшь. Чара барышында район башкарма комитеты җитәкчесе урынбасары Рамил Мөхетдинов аны сәхнәгә чакырып, юбилее белән котлады һәм истәлек бүләге тапшырды. Мондый ихтирам көтмәгән Нурия апа бермәлгә хәтта югалып калды. Аннан үзен зурлаулары өчен олы рәхмәтен белдерде.