ДАИның Арча район бүлекчәсе җитәкчесе Рөстәм Хәкимов: «Халык инспекторы» юлларда иминлекне арттыруга хезмәт итә

— Рөстәм Рәфхат улы, «Халык инспекторы» кушымтасының төп максаты нидә?

— Әлеге мобиль кушымта юл хәрәкәте иминлеген тәэмин итүдә нәтиҗәле инструментларның берсе булып тора. Ул гражданнарга юл хәрәкәте кагыйдәләрен бозу очраклары турында мәгълүмат җиткерү мөмкинлеге бирә. Килгән хәбәрләрнең барысы да Дәүләт автоинспекциясе хезмәткәрләре тарафыннан тикшерелә, күрсәтелгән мәгълүматның төгәллеге һәм җитәрлек булуы бәяләнә.

— Кушымтага килгән хәбәрләр юридик яктан нинди әһәмияткә ия?
— РФ Административ хокук бозулар кодексына ярашлы рәвештә, гражданнардан килгән хәбәрләр административ эш кузгату өчен нигез булып тора. «Халык инспекторы»на юлланган хәбәрләр дә шул ук хокукый көчкә ия. Кушымта хокук бозу фактын теркәргә, шул исәптән вакыйга урынын һәм вакытын автоматик рәвештә билгеләргә мөмкинлек бирә.

— Хәзерге вакытта нинди хокук бозулар теркәлә?
— Бүген кушымта 18 категория буенча хәбәрләр кабул итә. Алар арасында кызыл утка чыгу, каршы як полосага чыгу, куркынычсызлык каешын эләктермәү, телефон куллану, автобус полосасы буйлап йөрү, тукталу һәм парковка кагыйдәләрен бозу кебек очраклар бар. Шуларның алтысы буенча гражданнарга бүләкләр каралган.

— Кушымтаны кулланганда нинди таләпләрне истә тотарга кирәк?
— Иң мөһиме — транспорт чарасы белән идарә иткәндә кушымтаны куллану тыела. Бу юл-транспорт һәлакәтенә китерергә мөмкин. Мондый очракта телефон куллану өчен РФ Административ хокук бозулар кодексының 12.36.1 маддәсе нигезендә 1500 сум күләмендә штраф каралган.

— Сезнеңчә, кушымтаның киң кулланылышы нинди нәтиҗә бирәчәк?
— Кушымтаны актив куллану юл хәрәкәте кагыйдәләрен үтәүгә даими контроль хисе тудыра. Бу исә юл хәрәкәтендә катнашучыларның җаваплылыгын арттырырга һәм аварияләр санын киметергә ярдәм итәчәк.

Әңгәмә ахырында Рөстәм Хәкимов барлык юл хәрәкәте катнашучыларын юл хәрәкәте кагыйдәләрен төгәл үтәргә чакырды. Юлдагы иминлек һәркемнең җаваплылыгына бәйле.