Узган ялларда машина йөртү хокукыннан мәхрүм ителгән өч йөртүче тоткарланган

1 августта Казанда ЮХИДИ хезмәткәрләре Kia Optima автомобилен туктата. Руль артындагы 41 яшьлек ир-атта исереклек билгеләре ачыклана. Тикшерү барышында аның узган елның сентябрендә медицина тикшерүен узудан баш тартканы өчен 18 айга машина йөртү хокукыннан мәхрүм ителгәне билгеле була.

2 августка каршы төндә Казанда BMW автомобиле белән идарә иткән 29 яшьлек йөртүче дә тоткарлана. Ул да исереклек билгеләре белән туктатыла. Ачыкланганча, узган елның ноябрендә медицина тикшерүеннән баш тартканы өчен 19 айга йөртү хокукыннан мәхрүм ителгән булган. Бу юлы да ул медицина тикшерүен узудан баш тарта.

Шул ук көнне Болгар шәһәрендә йөртү хокукыннан мәхрүм ителгән 22 яшьлек «Лада» йөртүчесе тоткарлана. Алкотектор аның организмында 1,031 мг/л спирт булуын күрсәтә.

Барлык очраклар буенча да административ материаллар төзелгән, автомобильләр махсус тукталышка куелган.

Хокук саклау органнары мәгълүматларына караганда, йөртүчеләрнең гамәлләрендә Россия Җинаять кодексының 264.1 маддәсе буенча җинаять билгеләре бар. Аларга ике елга кадәр иректән мәхрүм ителү яный, шулай ук автомобильләре дәүләт файдасына конфискацияләнергә мөмкин.