Балалар бакчасындагы нәниләр төркемендә бармак театры эшчәнлеге

Уен эшчәнлеге – мәктәпкәчә яшьтәге бала үсешендә зур этәргеч. Балалар өчен уен тирәлеген булдыру мөһим шарт булып тора. Без кечкенәләр төркемендә тәрбиячеләр булып эшлибез. Үз эшебездә гадәти булмаган алымнар кулланып эшләргә тырышабыз. Күпсанлы тикшеренүләр һәм күзәтүләр кул бармаклары хәрәкәтләре үсеше дәрәҗәсенең сөйләм үсеше дәрәҗәсе белән туры килүен дәлиллиләр. Баланың телен ачуда, сөйләмен формалаштыруда бармак уеннары аерым урын алып тора.

Балаларның күңелен күтәрү өчен бармакка уенчык киеп куябыз. Бигрәк тә “Бармак театры” аша халык әкиятләрен сәхнәләштерүне аралашу мохитен булдыруда отышлы алым дип саныйбыз. Әкиятләрне сәхнәләштерү аша балаларны матур һәм сәнгатьле итеп сөйләшергә өйрәтү, әкиятләр белән аларның кызыксынучанлыгын арттыру, сөйләм телен баету, аралашу культурасы тәрбияләүне үзебезнең алдыбызда максат итеп куйдык. Әкренләп без балаларга эчтәлеге зур булмаган курчак театрлары күрсәтә башладык. Тора-бара балаларны спектакльдәге аерым фаразларны кабатларга теләк уяттык.

Халык әкиятләре һәм авторлар тарафыннан иҗат ителгән әкиятләр байтак. Без балалар белән аларны карап кына калмыйча сәхнәләштерү эшчәнлеге аша тормышка ашырабыз. Нәтиҗә ясап шуны әйтәсебез килә: киләчәктә дә сөйләм телен үстерү, сәхнәләштерү аша балаларны матур һәм сәнгатьле итеп сөйләшергә өйрәтүдә көчебездән килгәнчә тырышырбыз дип уйлыйбыз.

Зилә Зиатдинова, Светлана Фазлыйәхмәтова, Арчаның 2нче балалар бакчасы тәрбиячеләре