Батырларны барлар чак…

Тарих эзләре буйлап китсәк, мәктәбебез белән күп кенә күренекле шәхесләрнең язмышы бәйләнгән. Чыннан да, кемнәр генә укымаган да, кемнәр генә хезмәт куймаган безнең мәктәптә. Бездә атаклы, танылган врачлар да, югары даирәләрдә эшләүче олпат җитәкчеләр, фән эшлеклеләре, оста эшмәкәрләр, хәрби хезмәткәрләр, халык мәхәббәтен яулаган артистлар, телевидение хезмәткәрләре, авыл хуҗалыгы хезмәткәрләре, җырчылар туган. Без аларның барысы белән чын күңелдән горурланабыз!

Юкка гына мәктәбебез диварларында 3 бөек шәхескә мемориаль такта ачылмаган инде! 
Аларның берсе Александр Матросов батырлыгын кабатлаган авылдашыбыз Исхаков Кәрим Исхак улына багышлана.

30 гыйнвар көнне мәктәбебездә 2025 ел – Ватанны саклаучылар елына старт бирелде: Бөек Җиңү дәвамчысы, Бөек Ватан сугышы герое Исхаков Кәрим Исхак  улына багышланган “Тормыш – мизгел” дип исемләнгән очрашу булып узды. 

Очрашуда бөтен гомерен туган илебезнең тынычлыгын саклауга багышлаган хөрмәтле хәрби хезмәткәр, авылдашыбыз Рөстәм Гомәров, якташыбыз, Татарстанның атказанган мәдәният хезмәткәре, Татарстан Республикасы Язучылар берлеге әгъзасы, Габдулла Тукай мирасын саклау һәм үстерү фонды рәисе, “Ватаным Татарстан“ газетасы журналисты – Риман Гыйлемханов һәм Кәрим Исхаковның якын туганнары, мөхтәрәм ветеран укытучылар катнашты.  

Очрашуда Кәрим ага Исхаковның гомер юлы, аның Бөек Ватан сугышындагы тиңдәшсез батырлыгы хакында сөйләнде. 

Кәрим Исхаков – Александр Матросов батырлыгын кабатлап, дошман амбразурасын күкрәге белән каплаган батыр.   
Ул 1912 елда Арча районының Шушмабаш авылында туган. Алар берничә ир туган: Һади, Кәрим, Нәфыйк, Нәҗип, Бари. Һәрберсе тормышта мөһим эз калдыралар. Кәрим Исхаков Бөек Ватан сугышының беренче көннәреннән үк фронтка китә. 69нчы гвардия укчы дивизиясенең 208нче укчы полкы рядовое, автоматчысы. 1943 елның 5 октябрендә чуваш егете Арсентий Карташов белән бергә, дошманның ут ноктасын томалап, Кировоград өлкәсенең Старое Липово янында батырларча һәлак була.  Кәрим Исхаковның хатыны Фаһирә гомер буе – Шушмабашта, кызы Дилбәр Волгоград шәһәрендә яши.

Кешенең матурлыгы үз Ватанын яратуда, аны һәр минутта сакларга әзер булуда чагыла. Ватанны ярату – аның уңышлары белән горурлану, үз халкыңа файдалы булу, аңа авырлык килгәндә соңгы тамчы канга кадәр көрәшү дигән сүз. Шушы девизга тугры кала авылдашыбыз Кәрим абый Исхаков. Ләкин аның батырлыгы игътибарсыз кала һәм тиешле дәүләткүләм бүләкләрен ала алмый, Советлар Союзы Герое исеменә дә тәкъдим ителми.
Бүгенге көндә Кәрим абый батырлыгын махсус хәрби операциядә катнашучы егетләребез кабатлый. Бүген алар, Ватанны саклаучылар булып, намус һәм бурычларын сүздә түгел, ә эштә күрсәтәләр. Без аларны хаклы рәвештә чын геройлар дип атый алабыз. 
Кәрим Исхаков кебек шәхесләр 50-100 елга бер генә туадыр. Шушы Бөек Җиңү дәвамчылары булган батырларның безнең җирлектән булулары белән, аларның исемнәре тарих битләрендә зур хәрефләр белән язылып куелганлыклары белән без чиксез горурланабыз һәм алар истәлеге алдында баш иябез.  

Иркә Сәмигуллина, Шушмабаш мәктәбе укучысы