Түбән Мәтәскә мәктәбендә Әфганчылар белән очрашу

Шул уңайдан, 17 нче февраль көнне Д.Г.Хәкимов исемендәге Түбән Мәтәскә урта мәктәбендә  “Әфганстан-йөрәк ярасы!” дип  исемләнгән очрашу кичәсе үткәрелде. Мондый чараларны үткәрү  укучыларыбызда Әфганстанда  хезмәт иткән авылдашларыбызга  карата хөрмәт, горурлык хисләре тәрбияләү, батырлык төшенчәсенең асылын аңлату  максатыннан үткәрелә.Чарага безнең җирлектән Әфган илен, Әфган җирен үз күзләре белән күргән, анда барган сугышларда  катнашып, Ватан алдында хәрби бурычларын намус белән үтәгән  Түбән Мәтәскә авылы егете  Галиуллин Зиннур, Казиле авылыннан Сираҗиев Илгизәр, Югары Мәтәскәдән Шәкүров Илдар абыйлар чакырылган иде. Шуңа сөеник, исән кайткан Әфганчылар арабызда яши.Әмма, ни кызганыч, Мөндеш авылыннан  Әфган җирлегендә, кайнар ноктада хезмәт иткән Мөндеш авылы егете Камалиев Фәргать  Шәйхулла улы  бүгенгесе көндә арабызда юк.  Чара барышында гомерләре вакытсыз өзелгән якташларыбызны  бер минут тынлык белән искә алдык. Һәм “Үлгәннәрнең каберен, исәннәрнең кадерен бел!”дигән мәкальне күздә тотып, зиратка барып, Фәргать абыйның  рухына зиярәт кылып, чәчәкләр салып кайттык.

   Очрашуга килгән, сугыш авырлыкларын үз җилкәсендә татыган, һәрчак көр күңелле, йөзеннән беркайчан да елмаю китмәгән, тиз арада кешеләр, гади укучылар белән уртак тел табучы, шаян сүзләре белән башкаларның да кәефен күтәрүче  авылдашыбыз Галиуллин Зиннур абый үзенең  хатирәләре белән уртаклашты, укучыларны, укытучыларны кызыксындырган сорауларга җавап бирде. Укучыларга егет кешегә армиягә баруның кирәклеген искәртеп үтте. Ватанны саклау - ир-егетнең изге бурычы икәнен җиткерде.

 Мәктәп директоры Гайнетдинов  Илдар Борһан улы үз чыгышында егет кешенең армия сафларында хезмәт итүе ныклылыкка сынау үтү икәнлеген әйтте. Укучы егетләребезне дә батыр авылдашларыз үрнәгендә тәрбияләнеп, авырлыклар алдында бирешмәүче, үз алларына максат куеп, дөрес юлдан бара белүче ир-егетләр булырга чакырды. Патриотик тәрбия бирү максатыннан уздырылган чара укучылар өчен чын батырлык дәресе булды.

 Д.Г.Хәкимов исемендәге Түбән Мәтәскә урта мәктәбенең педагог-оештыручысы Сәгъдиева Халисә Камил кызы