Аллергияле кешеләргә ковидтан прививка ясатырга мөмкинме икәнлеге турында сөйләделәр

(Казан, 9 ноябрь, «Татар-информ», Эвелина Киселева). Аллергияле кешеләр яңа коронавирус инфекциясеннән прививка ясата ала, әмма бер кагыйдәне үтәргә кирәк. Бу хакта түбәнкамалыларга туры эфирда Татарстан Сәламәтлек саклау министрлыгының баш аллергологы, Республика клиник иммунология үзәге мөдире Алексей Лунцов сөйләде.

«Контрольдә тотыла яки өлешчә контрольдә тотыла торган эпизодлар чорында аллергияле кешеләргә вакцинация ясатырга була, ягъни ремиссия булганда  – чир көчсезләнгән яки аның симптомнары юкка чыккан вакытта мөмкин», - дип искәртте спикер.

Табиб сүзләренә караганда, Россия аллергологлар һәм клиник иммунологлар ассоциациясе шундый карарга килгән. Ягъни вакцинация аллергикларда хуплана, бары тиешле вакытны сайларга гына кирәк. Әйтик, поллинозлы пациентлар үсемлекләрнең аллергия бирә торган чәчәк ату чорын узарга тиеш.

«Аллергия авырулары бик киң таралган – планетада яшәүчеләрнең 30 проценты аллергиядән җәфа чигә», - дип сөйләде табиб.

Шул ук вакытта Алексей Лунцов вакцинация өчен теләсә нинди препаратны сайларга мөмкин булуын әйтте.

 https://tatar-inform.tatar/news/health/09-11-2021/allergiyale-keshel-rg-kovidtan-privivka-yasatyrga-m-mkinme-ik-nlege-turynda-s-yl-del-r-5842785