Питрәч районы башкарма комитеты башлыгының элекке урынбасары Дамир Байгильдин Казанның Вахитов районы суды каршына килеп басарга мәҗбүр булган. 26 яшьлек түрә Авыл хуҗалыгы һәм азык-төлек министрлыгыннан алдашу юлы белән 1,4 миллион сумлык грант алуда гаепләнелә.

Ул 2021 елда, грант отканнан соң сарыклар сатып алуга ялган килешү төзегәнлеге ачыклангач, кулга алынган. Бу хәлне ферма башлыгы раслаган. Өстәвенә чиновникның хезмәт кенәгәсендә, янәсе, терлекче булып эшләве турында ялган язуның урын алуы билгеләнгән. Аңа нәкъ менә шушы язу грант отарга ярдәм иткән дә.

Җинаять эшен тикшерү дәвам итә.