Арча сәхнәсендә премьера: «Яучылар» комедиясе зур уңыш белән үтте

30 апрельдә район сәхнәсендә чираттагы премьера узды

Таһир Закировның «Яучылар» өч пәрдәле водевиль-комедиясе район сәхнәсендә бер сулышта, җиңел һәм күңелле үтте. Тамашачылар артистларның уенын бик җылы кабул итте, һәр чыгыш көчле алкышларга күмелде. Залда утыручыларның йөзләрендә елмаю балкыды, күтәренке кәеф спектакль буена сакланды.

Сәхнәдә театрның тәҗрибәле артистлары һәм мәдәният өлкәсендә хезмәт куючы райондашларыбыз чыгыш ясады. Рольләрдә Харис Сафин, Адилә Нотфуллина, Илдус Хәбибуллин, Дилүс Сәләхов, Гөлнара Гыйниятуллина, Илназ Абзалов, Гүзәл Нигъмәтҗанова, Зәринә Гәрәева, Алсу Хөснетдинова катнашты.

Спектакльне сәхнәгә куючы режиссер - Илфак Хафизов. Режиссер ярдәмчесе - Гүзәл Нигъмәтҗанова. «Җидегән чишмә» театры җитәкчесе - Инсаф Мөхәммәтгалиев. Тавыш операторы - Марсель Дәүләтшин. Ә биюләрне сәхнәгә куючы - Аида Ондрина.

Премьера тамашачыларда якты тәэсирләр калдырды һәм театр коллективының иҗади мөмкинлекләрен тагын бер кат раслады. «Җидегән чишмә» театрына алга таба да иҗади уңышлар, яңа рольләр һәм тамашачы мәхәббәте телибез.

    Фотолар район мәдәният йорты архивыннан алынды