Авыл халкы бу көнне күптән көтте.
Арча районының Кәче авылында ел буе йөри торган яңа күпер төзелә. Казансу елгасы аша салыначак яңа корылма авылның ике өлешен тоташтырып, язгы ташу вакытында юл өзелү мәсьәләсен хәл итәргә тиеш. Бу хакта район матбугат хезмәте хәбәр итә.
Казансу елгасы Кәче авылын ике өлешкә бүлә. Язгы ташу чорында су күтәрелгәндә элекке күперне тулысынча су баса иде. Нәтиҗәдә авылның бер өлеше белән транспорт элемтәсе өзелә, ә ашыгыч ярдәм, янгын сүндерү хезмәтләре һәм башка автомобильләрнең анда барып җитә алмый.
Мондый очракларда кешеләр өчен бердәнбер юл булып җәяүлеләр күпере кала иде. Шуңа күрә яңа күпер төзелеше авыл өчен мөһим инфраструктура проекты булып тора.
“Төзелеш эшләре өч этапта алып барылачак. Быел инде күпер өчен свайлар кагу эшләре башланган. Автомобильләр хәрәкәтен өзмәс өчен вакытлыча күпер дә төзелгән”, – дип хәбәр итә район матбугат хезмәте.
Яңа күпер файдалануга тапшырылганнан соң Кәче авылының ике өлеше арасында транспорт бәйләнешен ел әйләнәсе тәэмин итү көтелә. Бу язгы ташу вакытында авыл халкының юлсыз калу куркынычын киметергә һәм ашыгыч хезмәтләрнең кирәкле урынга вакытында барып җитүенә мөмкинлек бирергә тиеш.
- Фотолар район матбугат хезмәтеннән
Хәзер Арча һәм Арча районы яңалыкларын безнең Telegram-каналдан да белә аласыз
Нет комментариев