Буада «Приют человека» мохтаҗларны кайнар аш белән тукландыру ноктасы ачылды

Буада аз керемлеләр өчен бушлай кайнар туклану пункты булдыру идеясен шушы районнан чыккан меценат, «Ханский дом» төзелеш компаниясе хуҗасы Ильяс Гыймадов җиткерде. Проектны Казан шәһәре эшмәкәре Азат Гайнетдинов Буа муниципаль районы башлыгы Ранис Камартдинов, район имам-мөхтәсибе Илмир хәзрәт Хәсәнов ярдәме белән тормышка ашырды.

Буа шәһәренең «Хаҗилар» мәчете имамы Фәһим хәзрәт Сөләйманов ярдәме белән көн саен 11дән 13 сәгатькә кадәр алтмыштан артык кеше кайнар ризык белән тәэмин ителә. Меню көн саен үзгәрә: ашлар, ит ризыклары, боткалар, пылау. Пункт Буа шәһәре мәдрәсәсе янында Либкнехт урамындагы 77нче йорт адресы буенча эшли. Приютка төшке аш әзерләргә мөмкинлеге булмаган һәркем килә ала, диелә хәбәрдә.

Реклама

Татарстан мөселманнары Диния нәзарәте мөхтәсибәтләре тырышлыгы белән шундый ук нокталар тагын Казан, Яшел Үзән, Чистай һәм Норлат шәһәрләрендә дә эшли.

Чыганак: https://tatar-inform.tatar/news/buada-priyut-celoveka-moxtalarny-kainar-as-belan-tuklandyru-noktasy-acyldy-5867350