Борычны кайчан утыртырга?

автор, 7 март 2020 - 09:34

1674

Болгар борычы безнең өстәл өстендә иң популяр яшелчәләрнең берсе. Татлы ризык булудан тыш, ул С витаминының кыйммәтле чыганагы да. Татлы борычны чи килеш тә еш кулланабыз, чөнки аңардан төрле салатлар әзерләргә була.

Борычны кайчан утыртырга соң? Аны утырту вакыты турында төрле фикерләр йөри. Ни генә язсалар да, аны һәрбер төбәктә табигать шартларына карап утырталар.

Башкортстан җирлегендә, бакчачылар аны 15 февральдән 10 мартка кадәр чәчергә киңәш итә. Борыч орлыклары бик озак - 2 атнадан алып айга кадәр шытып чыгарга мөмкин. Аларны март ахырында чәчсәң, орлыкның апрель азагында гына тишелгән очраклары була. Ул орлыкның сыйфатына да карый. Әгәр дә орлыкны шыттырып чәчсәгез, ул тизрәк чыгачак. Рассада 60-70 көн үскәннән соң ачык грунтка утыртыла. Борыч күчереп утыртуны яратмый, шуңа күрә борыч орлыкларын аерым савытларга чәчү яхшырак. Борычның тамыр системасы зур түгел, шуңа күрә диаметры 10 см булган савыт та җитә.

Кайбер бакчачылар борыч орлыкларын ай календаре буенча да утырта. Уңыш күбесенчә үсентеләрне дөрес утыртуга да бәйле.

2020 елгы ай календаре буенча, утыртуга уңай көннәр дип: 15, 16, 28 февраль; 1, 8, 9, 12 март күрсәтелгән.

Ә теплицага күчереп утырту өчен уңай көннәр: 8, 12, 13, 14, 15, 16, 17, 18 май. Башкортстан җирлегендә ачык грунтка борыч кыраулар тәмамлангач, якынча 10 июньнән соң утыртыла башлый.