Мөнирә Садыйкова (Яруллина) шигыре
Туган телне бәйләп йөрәкләргә,
Апрель саен Тукай эндәшә...
Язлар җиткәч, гүя терелә дә,
Халкы белән атлый янәшә!
Һәр тарафта - бөек Тукай рухы ,
Кая барма - шагыйрь эзләре!
Гасырларны иңләп, апрель җиле
Ирештерә Тукай сүзләрен!
Чорлар аша шагыйрь безгә дәшә:
-Саумы, халкым! Саумы, милләтем!
Тәнең сафмы, җаның сызламыймы,
Хәлең ничек синең, өммәтем?
Илтифатың өчен рәхмәт, халкым,
Шигъриятем сөеп зурлыйсыз!
Каберемне чәчкә-гөлгә күмеп,
Исемемне минем нурлыйсыз!
Васыятем кат-кат кабатлыймын:
Туган телне саклыйк, үстерик!
Затлы мирас итеп оныкларга -
Киләчәккә аны җиткерик!
Милли моңнар сибелсеннәр ерак,
Дәшеп изге Болгар иленә!
Тугры калып ерак үткәннәргә,
Дан җырлагыз әнкәй теленә!
20.04.2026 #тукайварислары
Нет комментариев