Арча шахматчылары Сабадан кайтты

Сабада Татарстан Республикасы Рәисе Рөстәм Миңнехановның әтисе Нургали Миңнеханов истәлегенә шахмат ярышлары булды. РСФСР һәм ТАССРның атказанган урманчысы Нургали Миңнеханов үзе дә шахмат уйнарга яраткан. Исән булса, аңа 24 мартта 95 яшь тулган булыр иде.

Ярышта 260 шахматчы катнашты. Безнең Арча районынннан да Арча Укучылар сараенда шахмат секциясен алып баручы тренер Айрат Яхин җитәкчелегендә 8 малай һәм кыз ярышка барды. Ярыштан кайткач, Айрат Яхин редакциягә кереп чыкты.

“Сабада Нургали Миңнеханов истәлегенә ел да шахмат ярышлары үткәрелә, - дип сөйләде ул. – Безнең бу ярышка бармый калган юк. Бу юлы да безнекеләр лаеклы чыгыш ясап кайттылар. 15-16 яшьлекләр арасында Рәниф Мостафин 2нче урынны алды. 16-17 яшьлекләр арасында Риана Камалиевада – 3нче урын. 2007-2009 елгылар арасында Инсаф Заһидуллин 2нче урынны алды. Һәм тагын Кәрим Әюпов, Чулпан Мостафина, Дилә Сабирова да матур уен күрсәттеләр".

Котлыйбыз һәм уңышлар телибез!