Арча укучылары яшь геологларның XII Республика ачык кыр олимпиадасында катнаша

Арча шәһәрендәге 5 нче гимназия укучылары яшь геологларның XII Республика ачык кыр олимпиадасында көч сынаша.

Быелгы олимпиадага Татарстанның 36 командасыннан 303 мәктәп укучысы җыелды. Шулай ук чарада Башкортстан Республикасы һәм Киров өлкәсеннән килгән кунаклар да катнаша.

Катнашучыларны 11 катлаулы бәйге көтә. Алар арасында «Геологик маршрут», «Минералогия», «Нефть геологиясе», «Магнитометрия» һәм башка сынаулар бар. Укучылар кыр шартларында эшләячәк, геологик киселешләрне тасвирлаячак, минерал эзләячәк, лагерь урыннары оештырачак һәм геологиянең фән генә түгел, ә нык ихтыяр һәм характер таләп итүче өлкә булуын исбат итәчәк.

Әлеге олимпиада Россия Мәгариф министрлыгы раслаган абруйлы олимпиадалар исемлегенә керә. Шуңа күрә җиңүчеләр һәм призёрлар профильле югары уку йортларына укырга кергәндә өстәмә баллар алачак. Быел 10 җиңүче һәм 20 призёрга мондый мөмкинлек биреләчәк.