Арчада үзәк чыршы янында тамаша

Хәзерге вакытта үзәк стадионда чыршы ачу тантанасы бара. Көн салкын булса да, кеше күп. Тансыклаганнар. Биеп торгач, туңмыйлар да. Биемичә дә түзә торган түгел. Матур, рәхәт бәйрәм. Ошады. Бизәлеш тә искиткеч. Чыршы - мәйдан күрке. Кече сәхнә янында Кыш бабай, Кар кызы, әкият геройлары белән кулга кул тотынып биеп була. Теләгәннәр уеннарда катнаша ала. Ә үзәк чыршы янындагы сәхнәдә танылган эстрада йолдызлары, үзешчәннәребез чыгыш ясый.

Арчаларны район башлыгы Илшат Нуриев котлады.

- Коронавирус дигән чир килеп чыгу нәтиҗәсендә ел авыр килде. Без генә түгел, бөтен дөнья халкы кыенлык кичерде. Әмма сынатмадык, ашлыгын да җыеп алдык, савымчыларыбыз да тырышты, төзелеш тә туктап тормады. Киләсе ел бары шатлыклар гына алып килсен. Сәламәт булыйк, - диде ул.

Бәйрәм дәвам итә.