Балаларга пособиеләрне башкача исәпли башлаячаклар

Баш бит  Хәбәр
Документ 2022 елда үз көченә керә.
Карар проекты нигезендә, төбәкләр хакимияте өч яшьтән җиде яшькә кадәрге балаларга, яшәү урыны буенча теркәлмәгән очракта да, пособие билгели алачак. Дәүләт ярдәме гаиләнең һәр әгъзасына туры килә торган уртача кереме төбәкнең яшәү минимумыннан артып китмәгән очракта бирелә.
Шул ук вакытта гаиләнең керемен исәпләүдә күчемсез милек, автомобиль яки башка мототранспорт сатып алуга дәүләт биргән субсидияләр, салым “вычет”лары, эшмәкәрлеккә ярдәм итү максатында алынган субсидияләр, грантлар һ.б керми.
Проект нигезендә, гариза тапшыру вакытына йөклелек чоры 12 атнадан арткан аналар, керемгә ия булмасалар да, пособие алачак. Исегезгә төшерәбез: керемсезләр өчен әлегә “нульле керем” дигән кагыйдә гамәлдә булып килә. Аның буенча, бары тик нигезле сәбәпләр белән генә керемгә ия булмаганнар пособие алуга хокуклы. Йөклелекнең алты аенда керемле булып, шуннан соң керемсез калган хатын-кызлар да пособиегә дәгъва кыла алачак (хәзерге кагыйдәләр буенча пособие өчен мөрәҗәгать итүгә 4 ай кала керемнәр беткән очракта гына пособие түләү мәсьәләсе карала).
Пособиегә дәгъва итүче гаиләнең мөлкәти хәлен бәяләүгә кагылышлы үзгәрешләр дә бар. Биредә фатир, торак йорт, бакча, җир кишәрлеге, гараж, машина, мотоцикл, трактор һәм көймә турында сүз бара. Яңа проект буенча, матди хәлне бәяләүдә гаиләнең кайбер байлыклары, әйтик, фатирның өчтән беренә һәм аннан да кимрәк өлешенә ия булу исәпкә кермәячәк