Безнең үз Героебыз бар

 Яңа Кенәр авылында безнең үз Героебыз – Стелла Зәки кызы Габдрахманова яши. Телефоннан шалтыратып, “Арча хәбәрләре” газетасы коллективы исеменнән иң яхшы теләкләрне ирештердек. Стелла апаны бүген котлаучылар күп. Район мәктәпләре укучылары белән онлайн очрашуда катнашкан. Ул үзе дә гомер буе балаларга белем биргән педагог. Рус теле укытучысы булып эшләде.

--Барысына рәхмәт! – диде Стелла апа. – Мин район газетасын укып барам, районның уңышлары өчен куанып яшим. Быел Арча районы республикада иң күп ашлык җыйнап алды бит. Мин моны игенчеләребезнең, район башлыгы Илшат Нуриевның зур хезмәте дип саныйм. Ул иртә яздан көзге кыр эшләре тәмамланганчы механизаторларның күңелен күреп, бүләкләр тапшыра, көч һәм рух бирә.

Сезгә нык сәламәтлек, шатлык һәм куанычлар телибез, Стелла апа!