Бәйрәмнәрендә дә туктатмасыннар иде инде

8 Март көнне юлга чыгып, рульдәге хатын-кызларны котлауны ЮХИДИ хезмәткәрләре матур традициягә әверелдереп җибәрде. Бу юлы да алар Арча үзәгенә чыгып, гүзәл затларыбыз идарә иткән машиналарны туктаттылар. Бәйрәмебездә дә безгә бәйләнмәсәләр иде инде, диючеләр дә булгандыр. Чөнки кайберләре каршыга чыгып туктарга ишарә ясаган ЮХИДИ хезмәткәрләрен күреп югалып кала. Әмма чәчәк бәйләмен күреп, котлау сүзләрен ишеткәннән соң, йөзләрендә шатлыклы елмаю барлыкка килә. Бәйрәмдә дә кадерләнеп өйдә утырмый бит хатын-кызларыбыз. Кайсы әнисен котларга ашыга, кайсы өйдәгеләрне сыйлау максаты белән кибеткә юл тота, ә кайберләре эшкә бара. Шундый тынгысыз затлар инде без, хатын-кызлар. Бәйрәмегез белән сезне. ЮХИДИ хезмәткәрләре аз гына күңёлегезгә шатлык өсти алган икән, алар шуңа да бик шат. Юллада исән-имин йөрегез, гаиләләрегездә тынычлык хөкем сөрсен.