Егылган -- тора алмаган

Әле яңа гына бер 81 яшьлек ветеран белән очраштык. Шаян күңелле кеше.

Үзенең ничек коронавируска каршы организмын чыныктыруы турында сөйләде.

-- Коронавирусны безнең кебек карт кешеләргә куркыныч, дип сөйлиләр. Тукта, болай өйдә ятып булмас дип, чаңгыда чыгарга булдым, -- дип сөйли ветеран. --  Малай да, оныклар да чаңгыда рәхәтләнәләр шуып. Ул вакытта кар бар иде әле. Оныкның ботинкалы чаңгыларын алдым да, арт якка чаңгы юлына чыктым. Ботинкаларны өйдән үк кидем. Хәзерге чаңгылар үзләре шуа икән алар, әй. Киттем шуып һәм барып та төштем. Хәйран шәп төштем. Тора алмыйм. Ятам кычкырып. Ярый әле арт як күршебез ишетеп алды. 

Тирес түгә торган чана белән алып кайттылар үземне өйгә. Хәйран аяклар авыртып йөрде. сынган җирем булмады үзе. Менә шулай, коронавирус шаукымы мине 81 яшемдә чаңгыга бастырды.

Ә үзе бабай рәхәтләнеп кеткелдәп көлә...