Игнатьев Путинны судка биргән

Михаил Игнатьев үзен вакытыннан алда җитәкчелектән алган өчен РФ президентын судка биреп, Югары судка иск тапшырган. Игнатьев ил башлыгының указын гамәлгә яраксыз дип танытмакчы.

Җавап бирүче як – президент!

Суд Игнатьевның гаризасын 21 майда кабул иткән.

Беренче суд утырышы 30 июньгә, 10 сәгатькә билгеләнгән.

Эшне хөкемдар Вячеслав Кириллов караячак. Суд картотекасында башкача хәбәрләр юк.

Путин Игнатьевны 29 гыйнварда эшеннән бушаткан иде. “Ышаныч югалту сәбәпле” вазифасыннан алынган экс-башлык бүген килеп үзен якламакчы.

Хәтерегездә булса, М. Игнатьев матбугат көнендә журналистларны “мочить надо” дип белдереп, ахырда гафу үтенде. Икенче очракта, яңа машина ачкычларын тапшырганда, МЧС хезмәткәрен эт кебек сикерергә мәҗбүр иткән иде.

Отставкага җибәрелүдән алдагы көнне М.Игнатьевны “Бердәм Русия” партиясеннән дә чыгардылар.

Ил Президенты белән судлашу, ялгышмасам, Русия тарихында беренчегә. Карап карарбыз, бу юлы Игнатьев ни майтарыр икән?

https://omet-rb.rbsmi.ru/articles/bilgele-bilgesez-d-nya/Putin-bel-n-sudlasha-289175/