Ир-ат бертуганының алты яшьлек кызын көчләүдә гаепләнә

Азнакайда яшәүче ир-ат бертуганының 6 яшьлек кызын сексуаль көчләүдә гаепләнә. Бу хакта Россия Тикшерү комитетының Татарстан буенча идарәсе җитәкчесенең ярдәмчесе Эльвира Газизова хәбәр итте.

Ачыкланганча, кызның әтисе хатыны белән аерылышканнан соң, бала әтисе белән яши башлаган. Эшкә киткәндә, әтисе кызын туганы белән калдырган. Ул исә, форсаттан файдаланып, бертуганының кызына карата сексуаль характердагы көчләү гамәлләре кылган.

Хәзерге вакытта 36 яшьлек ир-атка карата җинаять эше кузгатылган һәм суд психологик-психиатрия экспертизалары билгеләнгән.

Татар-информ