"Үлемсез полк" акциясе быел гадәти форматта узачак

9 майда илебез Бөек Ватан сугышында Җиңүнең 77 еллыгын билгеләп үтә. Һәр елны әлеге истәлекле көндә бөтен ил буенча “Үлемсез полк” парады үтәчәк, аның рәтендә миллионлаган кеше Бөек Ватан сугышында  катнашкан кешеләрнең фотопортретларын алып барачак. Соңгы елларда бу акция онлайн үткәрелде, шунысы куанычлы, пандемия башланганнан бирле әлеге парад быел беренче тапкыр гадәти форматта үткәреләчәк.

Безнең туган шәһәребездә дә әлеге акцияне үткәрү  матур традициягә әйләнде. “Үлемсез полк”та Арча районында яшәүче һәр кеше катнаша ала. Моның өчен аларга А3 форматыннан да кечерәк булмаган зурлыкта якыннарының фоторәсемнәрен әзерләргә, колоннада күренсен өчен аны янтыкка (штандартка) беркетергә кирәк.

Фронтовик-җиңүчеләр турында истәлекләре кадерле булган һәр кешене “Үлемсез полк” гомумроссия акциясендә катнашырга, сугышта катнашкан һәм тылда фидакарьләрчә хезмәт иткән якыннарыгызның фотопортретлары белән 9 майда Арча үзәк мәйданы аша үтәргә чакырабыз.

“Үлемсез полк”та катнашучылар 9 сәгать 30 минутта Интернационал урамы, 6 йорт (әдәбият һәм сәнгать музее) янында җыела.

Белешмәләр өчен телефон: 3-15-33 (Арча район Советының оештыру-гомуми бүлеге), 3-28-45 (Арча районы ветераннар советы).

Арча шәһәрендә “Үлемсез полк” акциясен оештыручылар