Пластик шешәләрне кая куйганнар?

Шундый заманда яшибез хәзер, бөтен нәрсәгә шикләнеп карыйбыз. Менә узган шимбәдә шәһәребезне чүптән арындыру буенча үткәрелгән чараны да каралтырга теләүчеләр табылды. Ул көнне аерып җыйган чүпне барыбер бер күчкә бушатканнар диючеләр дә булды. Татар тотып карамый ышанмый, дип тикмәгә әйтмиләр шул. Без дә чүпнең эзеннән полигонга юл алдык. Юлдашым "ЖКБС" ширкәте җитәкчесе Альберт Хәкимов.

- Нишләп алай эшлик инде! Күпме кешенең хезмәтенә, изге ниятенә төкерү булачак бит ул, - дип, Альберт Данисович ангар эчендәге контейнерлар янына алып керде. - Иртәгә мондагы чүпне пресслап төргәкләячәкбез. Бер машиналык җыелгач , Казанга илтәбез. Ышанмасагыз, иртәгә бу процессны үзегез килеп карый аласыз. Бу хезмәт безгә табыш китерми,әлбәттә. Чүп җыю безнең вазифага керми хәзер. Шулай да, әгәр мондый акция үткәрәләр икән, безнең оешма Арчабызны читартуга үз өлешен кертергә әзер.