Сишәмбе көнне, коры һава торышы көтелә, Татарстанның көнчыгыш районнарында гына кыска вакытлы явым-төшем булырга мөмкин. Төнлә һава температурасы 6-11 градус җылы була, көндез 19-24 градуска кадәр күтәрелә.

Чәршәмбе көнне, 6 июльдә, антициклон йогынтысында һава ныграк җылына башлаячак. Төнлә — 7-12 градус, көндез 24-31 градус кадәр җылы була. Явым-төшем көтелми.

7 июльдә төнлә температура 9-14 градустан түбән төшмәячәк. Ә көндез, кыска вакытлы яңгырлар һәм яшенле яңгырларга карамастан, һава 26-31 градуска кадәр җылыначак.

Җомга һәм ял көннәрендә төньяк-көнбатыш антициклон Татарстанга тагын да эссе һава торышы китерәчәк - көндезге сәгатьләрдә 27-32 градус эссе була. Шулай ук яшенле яңгыр көтелә.

Элегрәк «Татар-информ» 5 июльдән 11 июльгә кадәр Татарстанда урман янгыннары куркынычы югары булганга, шторм кисәтү кертелүен хәбәр иткән иде. Бу эссе һава торышына һәм явым-төшем булмауга бәйле.

Чыганак: https://tatar-inform.tatar/news/tatarstanda-32-graduska-kadar-esselek-kotela-5856897