Үги ана суд каршына баскан

1964 елгы Лира Кошелева 2006 елдан бирле ятимнәрне кабул итә. Үзенең өч улы өстенә ул тагын абыйлы-энеле Егоровларны ала. Алар үсеп чыгып китә, Лира Әнвәр кызының үз уллары да әйбәт кенә яши.
2014 елда Лира Кошелева Тутайда йорт сатып алып, уллыкка алу һәм опека үзәгенә кандидат булып языла. Бер-бер артлы тәрбиягә сигез бала ала. Ялгыз хатынның бу кадәр бала-чагага тиешле тәрбия бирә алуы шикле, әлбәттә. Дәүләт оешмаларының ерак авылда яшәүче бер апага бу кадәр тиктормасларны ышанып тапшыруы да гаҗәп.

Шау-шу быел февраль аенда күтәрелә. Балалар шифаханәгә баргач, Л. Кошелева йортына кайтмыйбыз, дип баш күтәрә, иң беренче чиратта, 14 яшьлек Наташа холыксызлана, кире кайтарсагыз яшәмим, үз-үземне үтерәм, дип яный хәтта. Бу хакта мәгълүм булгач та, анда полиция, опека, мәгариф бүлекләре, балигъ булмаганнар эшләре буенча комиссия хезмәткәрләре, психолог килеп җитә. Әңгәмәләр барышында балаларның барысы да үги ананың кыерсытуын, тән җәзасы бирүен, кычыткан белән чабу гына түгел, кул астына эләккән әйберләр белән дә сугуын сөйли. Балаларның тәнендәге инде төзәлгән җәрәхәт эзләре, җөйләр дә сагайта. Хатынга карата 117нче "Җәфалау" (Истязание) маддәсе буенча эш кузгатыла. Соңрак җинаять эшенә балаларны тиешенчә тәрбияләмәү турындагы сигез эпизод өстәлә. Җиде томлык җинаять эшендә җәзалау һәм җәфалау очраклары җентекләп дәлилләнгән. Үги ананың ике яшьлек сабыйны елавыннан туктату өчен салкын су краны астында тотуы, буада рөхсәтсез су коенган малайның башын чиләктәге суга тыгып торуы, ишегалдын начар җыештырган йөрәк авырулы малайның маңгаена чүкеч белән эләктерүе, суыткычтан рөхсәтсез колбаса алган 6 яшьлек кызчыкның бармагын пычак белән җәрәхәтләве һәм башка төрле җәза бирү очраклары теркәлгән. Бүген балалар бу җаһил кулыннан алынган, дип яза "Безнең гәҗит".
Хөкем карары нинди булыр, вакыт күрсәтер.

Фото: gzhi.mosreg.ru сайтыннан

https://kiziltan.rbsmi.ru/articles/obchestvo/gi-ana-sud-karshina-bastirilgan-12905/