Әлеге үзгәрешләр өч һәм аннан күбрәк бала тәрбияләүче гаиләләргә кагылачак. Алар арасында уллыкка яки кызлыкка алынган балалар да исәпкә алына. Гаиләгә ярдәм күрсәтү өчен балаларның яше 18 яшькә кадәр, ә көндезге бүлектә укучылар, балачактан инвалидлар һәм махсус хәрби операциядә катнашучылар өчен 23 яшькә кадәр булырга мөмкин.

Закон проекты нигезендә, күпбалалы гаиләләргә түбәндәге ташламаларны саклап калу карала:

• өч яшьтән алты яшькә кадәрге балаларны билгеләнгән исемлек нигезендә дарулар белән бушлай тәэмин итү;

• торак өчен түләү чыгымнарының социаль норма чикләрендә 30 процентын субсидияләү;

• коммуналь хезмәтләр өчен түләүнең билгеләнгән нормативлар кысаларында 30 процентын компенсацияләү;

• гомуми белем бирү оешмасында укучы бала өчен ата-ананың берсенә ай саен 120 сум күләмендә юл чыгымнарына субсидия бирү.

Укучы балага юл чыгымнары өчен түләү укуын тәмамлаганчы, әмма 23 яшьтән дә узмаган очракта гына каралган.

Бала һәлак булган очракта да ярдәм сакланачак

Закон проектында махсус хәрби операциядә катнашканда баласын югалткан гаиләләргә кагылышлы аерым норма да бар. Мондый очракта гаиләнең югарыда күрсәтелгән социаль ярдәм чараларына хокукы сакланачак. Ташламалар гаиләдәге иң өлкән балага 23 яшь тулган яки тулырга тиеш булган көнгә кадәр гамәлдә булачак.

Закон проекты Татарстан Республикасы Юстиция министрлыгында ведомствоара координация советының хокукый мәсьәләләр буенча эшче төркеме утырышында тикшерелгән. Утырышны юстиция министрының беренче урынбасары Илья Гомзик үткәргән.

Әлеге башлангыч күпбалалы гаиләләргә, шул исәптән махсус хәрби операциядә катнашучы балалары булган һәм якыннарын югалткан гаиләләргә социаль ярдәмнең өзлексезлеген тәэмин итүгә юнәлдерелгән.