2026 елның беренче кварталында Татарстанда 26,9 мең тонна кузаклы культура тикшерелеп, чит илләргә җибәрелде.
Татарстан Республикасы территориясендә агросәнәгать комплексы продукциясенең куркынычсызлыгын һәм сыйфатын бәяләү федераль үзәге филиалы белгечләре ел башыннан зур күләмдә тикшерү эшләре башкарды. Продукция Беларусь, Кытай, Сербия һәм Польша базарларына озатылган.
Белгечләр соя, борчак һәм вика партияләренә лаборатор анализ үткәрде. Нәтиҗәләр продукциянең сыйфат һәм иминлек таләпләренә туры килүен күрсәтте. Тикшерү эшләре техник регламентлар һәм импортлаучы илләр шартлары нигезендә башкарылды.
Филиалның инспекция органы җитәкчесе Светлана Белова сүзләренчә:
«Тикшеренүләр нәтиҗәсендә барлык партияләрнең контракт шартларына, импортлаучы илләр таләпләренә һәм Таможня берлеге техник регламентларына туры килүе расланды».
Экспорт географиясендә төп урынны Беларусь һәм Кытай алып тора. Беренче кварталда әлеге илләргә җибәрелгән продукция гомуми күләмнең 97 проценттан артыгын тәшкил иткән.
Шулай ук быел яңа юнәлешләр дә ачылган. Нурлат районыннан 23,9 мең тонна соя Беларуська озатылган. Мамадыш районыннан 22 тонна фацелия һәм Новошешминск районыннан 198 тонна вика Сербиягә җибәрелгән.
Татарстанның авыл хуҗалыгы тармагы тотрыклы үсеш күрсәтә, районнарда җитештерелгән продукция чит ил базарларында ихтыяҗ таба.
Чыганак: Татар-информ
Хәзер Арча һәм Арча районы яңалыкларын безнең Telegram-каналдан да белә аласыз
Нет комментариев