Арчада: берьюлы дүрт беркетмә буенча штраф салынды

Кичә безгә ЮХИДИ идарәсе җитәкчесе Ришат Хуҗин шалтыратты.

- Инстаграмны карап утыра идем, шундый бер постка юлыктым: Арча үзәге буйлап сулга, уңга уйнатып бер машина бара. Светофорның кызыл утына да карап тормадылар. Пассажиры тәрәзәдән яртылаш чыгып, күккә салют аттыра. Моны күргәннән соң ЮХИДИ хезмәткәрләре машина хуҗасын таптылар һәм аңа дүрт беркетмә - машинаны уйнатып барып, каршы яктан килгән машиналарга куркыныч тудырган, светофорның кызыл утына чыккан, пассажиры куркынычсызлык каешы такмаган, тәрәзәдән яртылаш чыгып барган өчен - төзеделәр. Хәзер аңа шактый суммада штраф түләргә туры киләчәк. Шулай ук пассажиры да куркынычсызлык каешы такмаган өчен штраф түләячәк. Моннан тыш тиешсез урында салют аттырган өчен МЧС та штраф салачак, - диде ул.