Лилия Фәйзрахманова: "Медицинада көн уздырырга дип, битараф булып йөрүчеләр эшли алмый"

“Хезмәткәрләребез киеренке режимда эшли. Халык арасында медицина хезмәтенең авырлыгын аңлаучылар аз, рәхмәт әйтүчеләр дә сирәк. Хезмәтебезнең нигезе — кешегә ярдәм итү, дәвалау, аякка бастыру. Шәхсән үзем медицинага кешегә ярдәм итәм, дәвалыйм дип кергән кеше. Без Советлар Союзы чорында үскән балалар, кулыбыздан бар нәрсә килә, төзекләндерәбез, төзибез, дәвалыйбыз дип үскән буын кешеләре. Медицинада көн уздырырга дип, битараф булып йөрүчеләр эшли алмый. Без әти-әниләр үрнәгендә, эш өчен янып–көеп яшәүчеләрне күреп үскәнгә, үзебез дә шуларча эшлибез. Бәйрәм дә, яллар да юк безнең өчен. Аңлаганнары өчен гаиләдәгеләребезгә зур рәхмәт! Хезмәттәшләремә, гади булып яңгыраса да, тормыш мәгънәсен үз эченә алган теләкләрем: сәламәт булсыннар, гаиләләре түгәрәк булсын. Бәйрәм белән сезне, хөрмәтле медицина хезмәткәрләре!”