Районда балигъ булмаган балаларның кичке вакытта иминлеген тәэмин итүгә юнәлдерелгән рейдлар дәвам итә. Әлеге чараларда ата-аналар һәм педагоглар катнаша.
Арчаның 5нче гимназиясе, Ашытбаш, Наласа һәм Түбән Мәтәскә мәктәпләре коллективлары да кичке рейдларга чыкты, дип хәбәр итә район мәгариф идарәсе.
Белгечләр искәртүенчә, мондый рейдларның төп максаты - балигъ булмаганнарның кичке вакытта караучысыз йөрүенә юл куймау һәм аларның иминлеген тәэмин итү. Россия законнары нигезендә, балигъ булмаган бала 22:00 сәгатьтән соң урамда өлкәннәрдән башка йөргән очракта, аның әти-әнисенә карата административ чаралар күрелергә мөмкин.
Аерым алганда:
- Россия Федерациясе Административ хокук бозулар кодексының 5.35нче маддәсе нигезендә ата-анага административ беркетмә төзелергә мөмкин;
- балигъ булмаган бала балигъ булмаганнар эшләре буенча комиссиядә исәпкә куелырга мөмкин;
- өч сәгать эчендә баланы әти-әнисенә тапшыру мөмкин булмаса, ул вакытлыча тоту үзәгенә яки полициянең дежур частена урнаштырылырга мөмкин.
Нет комментариев