Җырчының якын дусты Татарстанның атказанган мәдәният хезмәткәре Әлфия Хәбибуллина күңелендә калган үкенечле хисләре белән уртаклашты. 

“Нурәхмәт 2006 елның 1 гыйнварында фаҗигале төстә арабыздан китте. Без аның белән бик якын дуслар идек... Быел унбишенче язны аннан башка гына каршы алдык...

Нурәхмәтнең күршесендә бер апа яши иде. Шул апаның төрмәдән кайткан племяннигы дустын ияртеп, талау нияте белән Нурәхмәтнең өенә кергән. Бу – дөрес версия, чөнки мәрхүмнең өеннән хәтта телевизор пультын да алып чыкканнар иде. Мөгаен, телефон дип уйлаганнардыр.

Иң аянычлысы – бөтен дисклары юкка чыкты. Соңгы вакытта яздырган җырлары, шактый материал югалды. Өч тапкыр суд булды, җинаятьчеләрне бик тиз таптылар. Чернышев фамилияле судья гаепләнүчеләрнең берсе тарафыннан сатып алынган иде. Аның күзләрен әле дә хәтерлим. Мин ул судьяның фамилиясен әйтергә курыкмыйм. Беренчедән, ул анда хәзер эшләмидер. Икенчедән, суд органнарында мондый җирбитләрнең эшләвен халык белеп торсын. Нәтиҗәдә күрше апаның племяннигын 9 елга ирегеннән мәхрүм иттеләр, ә судьяны сатып алган җинаятьче штраф белән котылды. 

Ул вакытта судка журналистларны чакырдым. Ләкин судья өч судның берсенә дә журналистларны кертмәде, камераларны куып чыгарды. Шунысы үкенечле: Нурәхмәтне җирләргә кайта алмадым, чөнки ул елны Яңа елны каршы алырга Пермьнән дуслар килгән иде. Аларны озатканнан соң, телефоннарны сүндереп йокларга яттым. Өй телефонын кабызгач, 2 гыйнвар көнне иң беренче булып шушы коточкыч хәбәр килеп иреште. Йөрәкне әрнеткән әйбер шул: Нурәхмәтнең җәсәден алып кайткач, әнисе “Әлфия кайтмадымы?” дип сораган. Менә шул бүгенге көнгә кадәр йөрәкне әрнетә”, - дип сөйләде безгә Әлфия Хәбибуллина.

Реклама

Нурәхмәт Мөхәммәтҗан өйләнмәгән, әмма кызы бар. Исән чагында һәрвакыт кызына ярдәм итеп яшәгән.

Мәрхүмнең урыны оҗмахта булсын...

Тулырак: http://shahrikazan.ru/news/shou-biznes/oend-terelgn-yrchy-nurkhmt-mkhmmtanga-58-yash-tulgan-bulyr-ide