«КазанФорумы» кысаларында мөселман тарихи-мәдәни мирасын саклау мәсьәләләренә багышланган очрашу узды. Чарада Татарстан Республикасының мәдәни мирас объектларын саклау комитеты рәисе Иван Гущин республикада мәчетләрне реставрацияләү буенча башкарылган эшләр турында сөйләде.

Бүген Татарстанда 1606 мәчет исәпләнә. Шуларның 110ы дәүләт тарафыннан саклана торган мәдәни мирас объектлары исемлегенә кертелгән. Моннан тыш, мәчетләр белән бәйле 24 тарихи объект — мәдрәсәләр, мулла йортлары һәм уку биналары да саклау астында тора.

2020 елдан башлап республикада мәчетләрне торгызу һәм яңарту эшләренә 1,82 млрд сум юнәлтелгән. Финанслауның бер өлеше республика бюджеты хисабына башкарылган. Шулай ук федераль ярдәм һәм хәйрия акчалары да җәлеп ителгән.

Иван Гущин сүзләренчә, тарихи биналарны саклау — мәдәни мирасны киләсе буыннарга тапшыру өчен әһәмиятле эш.

Биектау районының Айбаш авылында урнашкан агач мәчеттә реставрация тулысынча тәмамланган. Аны ачу тантанасы быел Ураза гаете көнендә узды.

Казандагы 1897 елда төзелгән Завод мәчетендә дә этаплап яңарту эшләре алып барыла. Әлеге проект хәйрия ярдәме белән гамәлгә ашырыла.

2026 елда Кукмара районының Әсән-Елга авылында һәм Питрәч районы Шәле авылында тарихи агач мәчетләрне торгызу планлаштырыла. Хәзерге вакытта әлеге проектлар өчен финанслау чыганаклары эзләү дәвам итә.

Татарстанда тарихи мәчетләрне саклау һәм реставрацияләү буенча эшләр алдагы елларда да дәвам итәчәк.

Чыганак: Татар-информ